අෂ්ඨාංගික මාර්ගය සෑම බෞද්ධයෙකු විසින් ම මනාවට වටහා ගනිමින් මනාවට සිත්සතන්හි අවබෝධයෙන් යුක්තව පුරුදු පුහුණු කළ යුතු උතුම් ධර්ම මාර්ගයයි.
නිවැරදි දැක්මක් ඇත්තහුට, සම්මා සම්බුදු පියාණන් වහන්සේ දේශනා කොට වදාළ ශ්‍රී සද්ධර්මය ශ්‍රී ලංකාවේ ඉතා පිරිසිදුව පවතින බව නොරහසකි. මේ මහා නිධානය පොතට පමණක් සීමා නොකර; කර්ම වශයෙන්, යෝග වශයෙන්, භාවනා වශයෙන්, මෙන්ම මනසිකාර වශයෙන් නිවැරදිව පුරුදු පුහුණු කිරීමෙන් මගඵල සාක්ෂාත් කර ගත යුතු දෙයකි. නිවැරදි මග පෙන්වීමකින් සහසම්බන්ධවන ලක්වාසී, ලෝකවාසී, බොහෝ දෙනා මේ සද්ධර්මය මනාකොට උගනිති.
එහෙත් ලොව එය ප්‍රායෝගිකව අභ්‍යාස කිරීමක් ඔවුන් අතර දකින්නට නොමැත. එම නිසා මේ අවාසනාවන්ත තත්ත්වයෙන් ඈත්වී, උතුම් වූ මානසික අභිවෘද්ධිය ලබන්නට ධර්මය ප්‍රායෝගික ක්‍රියාමාර්ගයක් බවට පසක් කරවන්නට සම්මා සමාධිය අත්දැකීමෙන් ප්‍රගුණ කිරීමෙන්, කායික මානසික නිදහස උදෙසා භාවනා යෝග වැඩීමටත්, පසුව පසුබිමක් පසුතලයක් තුළින් මෙලොව, පරලොව සහ නිවන යන තුන් අභිරුද්ධියම ලබන්නට, උතුම් අරිඅටමග පූර්ණය කිරීමට අවශ්‍ය නිසි පසුබිම, පසුතලය මෙන්ම කලන වැටේ රැකවරණය සලසා දීම අරමුණු කර ඔබ වෙනුවෙන්ම සැකසුණු නිවනට හිත පිහිටුවන නිහඬ අරණයි.
නිහඬ අරණට පැමිණෙන ඔබට, නිවීම උදෙසා වන කාය කර්ම, වචී කර්ම, සහ මනෝ කර්ම මෙහෙයවීම ප්‍රායෝගිකව අත්විඳින්නට හැකි වෙනවා නොඅනුමානයි.
භාවිතව බහුලීකෘතව තමා තුළින් දක්නට, සවනට පමණක් සීමා නොවන්නට, දැනුමට පමණක් සීමා නොගන්නට, නිවන් මගට හුරු වූ විශ්වාසවන්ත මනසක් ගොඩනගන්නට භික්ෂු, භික්ෂුණී, උපාසක, උපාසිකා යන සිව්දිග සිව්වනක් පිරිසට උපනිශ්‍රය ප්‍රත්‍ය පරිසරය නිහඬ ආරණ්‍ය තුළින් නොඅඩුව සැලසේවායි අපි ප්‍රාර්ථනා කරමු.
සසර දුක් කෙළවර කර නිවීමේ අරමුණ සිතට නැගුණු, ලෝකයේ අසාරත්වය මෙන්ම නිවනේ ශාන්ත ප්‍රණීත බව දකිමින්, මූලික ධර්මාවබෝධය ලද පිරිස් උදෙසා, විවේකයෙන් නිදහස්ව සංකාර ලෝකයෙන් ඉවත් වීමට සිත පුරුදු පුහුණු කරගැනීමටත්, කායික මානසික නිදහස උදෙසා භාවනා යෝග වැඩීමට අවශ්‍ය නේවාසික පහසුකම් ප්‍රත්‍ය පරිසරයක් නිර්මාණය මෙන්ම, සත්පුරුෂයන් උදෙසා කල්‍යාණ මිත්‍ර සේවනය නොඅඩුව ලැබදෙන උත්තම භූමියක් ලෙස සමාජයට දායාද කිරීම මූලික පරමාර්ථය වේ…
සියළු සත්ත්වයෝ නිවනින් නිවී සැනසෙත්වා ... !!!
