බලු කපුටු දානය නසයි සෙනසුරු දොසය…
අපල වලින් මිදීමට ඉතා පහසුවෙන් සිදුකළ හැකි බලු කපුටු දාන නිසි පිළිවෙළට සකස්‌ නොකර දීමෙන් නැති අපලද එක්‌කරගෙන අනවශ්‍ය පීඩා විඳීම වෙනුවට ඒ පිළිබඳව දැනුවත්ම එම කටයුතු සිදුකර තම බලාපොරොත්තු ඉටුකර ගැනීමට ජන්මීන් දැනුවත් විය යුතු කරුණු රාශියක්‌ මෙසේ දැක්‌විය හැකිය.
වින රැඳි ග්‍රහ අපල ලෝදන හද රිදවා
පින මද බැවින් පව්කම් ලොව පලදෙනවා
දෙන බලු කපුටු දානය මත බල හිඳුවා
සෙනුසරු අපල සත්තයි දුරුවී යනවා
සෙනසුරු යන නම ඇසූ පමණින් බොහෝ ජන්මීන් අධික ලෙස බියට පත්වේ. එයට හේතුව නම් ග්‍රහලොව සිටින නපුරුම ග්‍රහයා සෙනසුරු වන බැවිනි. මෙකී නපුරු ස්‌වභාවය නිසාම ග්‍රහයන් නව දෙනා අතරින් වැඩිපුර කතාබහට ලක්‌වන සෙනසුරු හැමවිටම අයහපත් ප්‍රතිඵල ගෙනදෙන ග්‍රහයකු නොවේ. යමෙකුගේ ජන්ම පත්‍රය යහපත් තැනක ශනි තැන්පත් වුවහොත් එකී පුද්ගලයාට යහපත් ප්‍රතිඵලම උදාකරනු ඇත.
ඒ අනුව සෙනසුරු, මකර, කුම්භ, තුලා යන රාශියක උප්පත්තියේදී සතර කේන්ද්‍රය තුළ පිහිටියේ නම් එවැනි ජන්මීන්ට සෙනසුරු ග්‍රහයා ඉතා සුබඵල ලබාදෙන අතර වෘෂභ, තුලා ලග්න හිමියන්ට සෙනසුරු සුබවාදී ග්‍රහයෙකි.
